De Prensa

La Voz de Galicia, o xornal de máis difusión de Galicia, recolleu nas súas páxinas a entrega a DAVEIGA produción responsable de catro certificados de calidade entregados por Aenor, así como a visita do conselleiro de Innovación e Industria da Xunta de Galicia á súas instalacións (La Voz de Galicia, 5 de febreiro de 2009).

Pola súa parte, a edición do Deza do mesmo xornal fíxose eco na nova o domingo 8 de febreiro, resaltando a orixe dezana dos fundadores da empresa.

El Progreso tamén recolle a nova na edición do 5 de febreiro, cun amplo tratamento sobre a visita de Fernando Blanco á fábrica e a entrega dos certificados de calidade, así como unha entrevista ao coordinador xeral da empresa, Xosé Lois Lamazares.

O Telexornal Mediodía da Televisión de Galicia recolleu hoxe a nova da entrega de certificados de calidade a DAVEIGA.

Para ver o video pulsar no enlace.

Fernando Blanco, Conselleiro de Innovación e Industria da Xunta de Galicia visitou as instalacións de DAVEIGA produción responsable como acto previo á entrega de certificacións de calidade por parte de Aenor, comprobando o alto nivel das instalacións e as esixencias de calidade ao longo de todo o proceso de produción.

O Conselleiro e o director de Aenor para Galicia, Martín Pita, escoitaron as explicacións do coordinador xeral de DAVEIGA, Xosé Lois Lamazares, sobre a orixe das galletas mariñeiras, as materias primas empregadas, as distintas variedades que se producen e o proceso de producción.

Despois da entrega dos catro certificados de calidade a DAVEIGA, única empresa galega en posesión dos mesmo, o Conselleiro resaltou as dificultades para conseguir ditos certificados e a importancia de potenciar as producións galegas de calidade.

Na presentación pódense ver algunhas imaxes da visita.

A empresa LUGAR DA VEIGA recibiu esta mañá 4 certificados da Asociación Española de Normalización e Certificación (AENOR) que acreditan a aposta pola calidade e a mellora continua da compañía especializada na elaboración de GALLETAS MARIÑEIRAS. A entrega dos recoñecementos tivo lugar na sede da compañía (Chantada, Lugo) nun acto que contou coa presenza do Conselleiro de Innovación e Industria da Xunta de Galicia, Fernando Blanco.

O Xerente de LUGAR DÁ VEIGA, Xosé Lois Lamazares, recibiu de mans do Director de AENOR en Galicia, Martín Pita, os certificados de Sistemas de Xestión da Seguridade Alimentaria (segundo a norma ISO 22000 e o protocolo de distribución alemá e francesa IFS), o de Xestión da Calidade (segundo ISO 9001) e o de Xestión Ambiental (ISO 14001).

A certificación é a manifestación de conformidade por unha entidade independente e co rigor de AENOR, de que unha organización cumpre cos requisitos que establecen as normas e implica a implantación dun Sistema de Xestión que aposta pola mellora continua. AENOR é a entidade líder en certificación tanto numericamente como na consideración de todos os axentes económicos.

En concreto, DAVEIGA obtivo os certificados de Seguridade Alimentaria baseados na Norma ISO 22000 e o protocolo de distribución alemá e francesa IFS. O alcance de ISO 22000 inclúe a produción e expedición de galletas. A norma internacional ISO 22000 establece os requisitos para desenvolver un Sistema de Xestión da Inocuidade dos Alimentos co obxectivo último de ofrecer alimentos seguros para o consumo e é o único que se aplica a todas as organizacións involucradas na cadea alimentaria (produtores primarios, fabricantes de alimentos para animais, de envases, industrias alimentarias, empresas de hostalería, entre outras).

Así mesmo, LUGAR DA VEIGA recibiu o Certificado de Seguridade Alimentaria en base ao protocolo de distribución alemá e francesa IFS. Trátase da certificación que este sector demanda aos seus provedores de Marcas Propias. Os seus requisitos son similares aos do protocolo de distribución británico BRC.

Ademais, DAVEIGA obtivo o Certificado de Calidade (ISO 9001), cuxo alcance cobre o deseño e a produción de galletas. Con este recoñecemento, LUGAR DA VEIGA, acredita o seu compromiso coa calidade, en resposta á súa constante mellora nos procesos. As vantaxes desta certificación son a eliminación dos custos da “non calidade”, o logro dunha maior implicación dos profesionais e, ademais, unha maior convicción na transmisión do compromiso coa calidade a todos os públicos dunha organización. ISO 9001 é a norma “estrela” de xestión da Calidade en todo o mundo cun millón de certificados en 175 países.

Para rematar, DAVEIGA obtivo o Certificado de Xestión Ambiental (segundo ISO 14001) de AENOR, cuxo alcance cobre o deseño e produción de galletas da empresa. ISO 14001 é a norma de xestión ambiental máis estendida no mundo con máis de 150.000 certificados en 148 países. Os seus principais beneficios son a minimización dos impactos ambientais, os beneficios económicos e legais e a valoración por parte das Administracións Públicas para acceder a contratos.

DAVEIGA produción responsable recibirá mañá, 4 de febreiro, un total de catro certificacións Asociación Española de Normalización e Certificación (AENOR) que acreditan a aposta pola calidade e a mellora continua da compañía.

Ao acto de entrega das certificacións, que terá lugar na sede da empresa, asistirán o Conselleiro de Innovación e Industria, Fernando Blanco, e o director de AENOR en Galicia, Martín Pita.